हमर लोकतन्तर

                        -जनकवि स्व.कोदूराम "दलित"

आइस  हमर  लोकतन्तर  के आज तिहार  देवारी
जुगुर - बुगुर  तैं   दिया बार दे,  नोनी  के महतारी  .

सुत-उठ के फहराइस  बड़की भउजी आज  तिरंगा
अस नान्दिस डोकरी दाई हर  कहिके हर- हर गंगा .

घर-दुवार मा बन्धगै  सुग्घर तोरन  धजा- पताका
संझाकुन हम खूब चलाबो - बम,फुलझरी ,फटाका.

पहुंचिस  आज  उदुप  ले ठौंका ,साढू  हमर सुदामा
गंज  अकन नेता के छापा  चटकाइस भितिया मा .

रंगू    पुरोहित   ला   दे  के ,   नगदी  सवा - रुपैया 
भारत  -  माता  के  पूजा   करवाइस    भंगू   भैया .

ठुमुक-ठुमुक मनटोरा नाचै,  पुनिया ढोल बजावय
बड़निक राग धर जन-गन- मन के फगनी टूरी गावय .

अरुण कुमार  दूध  पी के,   मारै अड़बड़ किलकारी
हँस-हँस के जय-हिंद करै  , सबला  मंजुला कुमारी .

हमर सास हर ठेठरी ,खुरमी, भजिया,बरा पकावय
लमगोड़वा , भउजी के भाई , चोरा -चोरा के खावय .

 
ठौंका  कुकरा-बासत  हमर , जुलूस निकलगे भारी
जै-जैकार करत किंजरिन, बस्ती भर के नर-नारी .

 
फेर तिरंगा झंडा के सब झन मन लिहिन सलामी
चहा पिइन एक्के सँग बाम्हन ,बनिया अउ सतनामी .

हमर गाँव के कुछ ढोंगी मन,लम्हा तिलक लगावयं
हरिजन मन के छुआ मानय, चिंगरी मछरी खावयं .

चांउर   -कपड़ा  सब  गरीब  ला  , बांटिस  बंठू  दाऊ
बुलबुल   छाँटत-छाँटत  निच्चट  थक गय नंदू नाऊ .

चरर-चरर  गरुवा  मन  खातिर , बल्दू  लूवय  कांदी
कलजुग ला सतजुग कर डारे,जय जय हो तोर गाँधी .

जगर मगर बस्ती हर बोलय ,  खेत- खार  रुपसाय
ठऊर-ठऊर मा नाचा -गम्मत  ,भासन होवत जावय .

सुटुर-सुटुर सटकिस  समधिन हर ,देखे खातिर नाचा
रोवत ओकर पिछ्लग्गा , भागिस   भगवानी   भांचा.

जइसन बनिस जउन से तइसन ,खूब बनाइन खाइन
नाचिन-गाइन ,खेलिन-कूदिन,दिन भर मउज उड़ाइन .

अब हम भेदभाव ताज के,सहकारी समिति बनाबो
मिल के सबो काम ला करके ,सबके सब सुख पाबो.

हे भगवान ! सद्बुद्धि हमर सब भाई मन ला आवय
जल्दी बपुरा दीन-दलित के,दुःख-दरिद मिट जावय .

फूलय फलय स्वर्ग बन जावय ,हिंद देश  ये प्यारा
"गणतन्तर हो अमर" सदा हम ,इहिच लगाई नारा.

          ************************